«Марсель» жамоасининг янги бош мураббийи этиб Хабиб Бейе тайинланди. 48 ёшли мутахассиснинг тайинлангани ҳақида «провансалликлар» матбуот хизмати эълон қилди. Сенегаллик мураббийнинг сўнгги иш жойи «Ренн» клуби эди ва у ушбу лавозимни шу ой бошида тарк этганди.
Хабиб Бейе футболчилик фаолияти давомида 2003 йилдан 2007 йилгача «Марсель» шарафини ҳимоя қилган. У «оқ-кўклар» бошқарувида ўтган ҳафта истеъфога чиққан Роберто Де Дзербининг ўрнини эгаллади.
Айни дамда «Марсель» 22 турдан сўнг 40 очко билан Лига 1 турнир жадвалида тўртинчи ўринни эгаллаб турибди. Жамоа шу жума куниёқ чемпионат доирасида «Брест»га қарши сафар ўйинини ўтказади. Учрашув Тошкент вақти билан 00:45 да (шанбага ўтар кечаси) бошланиши режалаштирилган.
