Испания миллий терма жамоаси бош мураббийи Луис де ла Фуэнте жамоанинг дарвоза чизиғидаги иерархия ҳақида тўхталиб ўтди. Мутахассис «Атлетик» посбони Унаи Симоннинг ўрни ҳозирча дахлсиз эканлигини таъкидлади.
«Ҳозирда Унаи Симон олдинда. У бизнинг биринчи рақамли ўйинчимиз. У катта тажрибага, кучли шахсиятга эга ва йирик турнирларда терма жамоа учун ўз маҳоратини исботлаб бўлган. Ҳозирча у бизга дарвозада хавфсизлик ва етакчиликни таъминлаб бермоқда», — дейди де ла Фуэнте.
Шу билан бирга, мураббий ёш иқтидорларнинг ўсишини ҳам эътибордан четда қолдирмади. Хусусан, «Барселона»га ўтганидан сўнг порлаётган Жоан Гарсия ҳақида илиқ фикрлар билдирди:
«Албатта, Жоан Гарсия каби иқтидорли дарвозабонлар ҳам бор. Рақобат очиқ ва футболда вазият тез ўзгариши мумкин. ЖЧ-2026 олдидан нима бўлишини билмайман, аммо бугунги кунда Унаи биз учун намуна бўлиб турибди».
