Ispaniya milliy terma jamoasi bosh murabbiyi Luis de la Fuente jamoaning darvoza chizig‘idagi iyerarxiya haqida to‘xtalib o‘tdi. Mutaxassis «Atletik» posboni Unai Simonning o‘rni hozircha daxlsiz ekanligini ta’kidladi.
«Hozirda Unai Simon oldinda. U bizning birinchi raqamli o‘yinchimiz. U katta tajribaga, kuchli shaxsiyatga ega va yirik turnirlarda terma jamoa uchun o‘z mahoratini isbotlab bo‘lgan. Hozircha u bizga darvozada xavfsizlik va yetakchilikni ta’minlab bermoqda», — deydi de la Fuente.
Shu bilan birga, murabbiy yosh iqtidorlarning o‘sishini ham e’tibordan chetda qoldirmadi. Xususan, «Barselona»ga o‘tganidan so‘ng porlayotgan Joan Garsiya haqida iliq fikrlar bildirdi:
«Albatta, Joan Garsiya kabi iqtidorli darvozabonlar ham bor. Raqobat ochiq va futbolda vaziyat tez o‘zgarishi mumkin. JCH-2026 oldidan nima bo‘lishini bilmayman, ammo bugungi kunda Unai biz uchun namuna bo‘lib turibdi».
