Англиянинг «Борнмут» клуби ҳимоячиси Маркос Сенеси Италиянинг «Ювентус» клуби билан бўлаётган музокараларга ижобий муносабат билдирди. Бу ҳақда «La Gazzetta dello Sport» нашри хабар бермоқда.
Манбанинг маълумотига кўра, Сенеси ёзги трансфер ойнасида Турин клубига ўтишга қарши эмаслигини маълум қилган. Футболчининг амалдаги шартномаси 2026 йилнинг июнида ниҳоясига етади ва ундан сўнг у эркин агентга айланади. Таъкидланишича, 28 ёшли аргентиналик футболчи «Ювентус»нинг келгуси мавсум учун ҳимоячилар шорт-листида биринчи ўринда турибди.
«Ювентус» Сенесига мавсумига 4 миллиондан 5 миллион еврогача маош ва 2029 ёки 2030 йилгача мўлжалланган шартнома таклиф қилмоқчи. Аввалроқ Сенесининг «Барселона»га ўтиш истаги борлиги ҳақида хабарлар тарқалган эди.
Жорий мавсумда 28 ёшли ҳимоячи 27 та ўйинда майдонга тушиб, 4 та голли узатмани амалга оширди ва 7 та сариқ карточка олди. «Transfermarkt» портали унинг бозор қийматини 22 миллион еврога баҳоламоқда.
