Angliyaning «Bornmut» klubi himoyachisi Markos Senesi Italiyaning «Yuventus» klubi bilan bo‘layotgan muzokaralarga ijobiy munosabat bildirdi. Bu haqda «La Gazzetta dello Sport» nashri xabar bermoqda.

Manbaning ma’lumotiga ko‘ra, Senesi yozgi transfer oynasida Turin klubiga o‘tishga qarshi emasligini ma’lum qilgan. Futbolchining amaldagi shartnomasi 2026 yilning iyunida nihoyasiga yetadi va undan so‘ng u erkin agentga aylanadi. Ta’kidlanishicha, 28 yoshli argentinalik futbolchi «Yuventus»ning kelgusi mavsum uchun himoyachilar short-listida birinchi o‘rinda turibdi.

«Yuventus» Senesiga mavsumiga 4 milliondan 5 million yevrogacha maosh va 2029 yoki 2030 yilgacha mo‘ljallangan shartnoma taklif qilmoqchi. Avvalroq Senesining «Barselona»ga o‘tish istagi borligi haqida xabarlar tarqalgan edi.

Joriy mavsumda 28 yoshli himoyachi 27 ta o‘yinda maydonga tushib, 4 ta golli uzatmani amalga oshirdi va 7 ta sariq kartochka oldi. «Transfermarkt» portali uning bozor qiymatini 22 million yevroga baholamoqda.