«ПСЖ» бош мураббийи Луис Энрике Чемпионлар лигаси плей-офф босқичи доирасидаги илк ўйин — "Бенфика" ҳамда "Реал Мадрид" жамоалари ўртасидаги баҳсда юз берган ирқий можаро ҳақида фикр билдирди.

«Бу масала бўйича айта оладиган ҳар қандай гапим ҳеч қандай аҳамиятга эга эмас», — деди Энрике клубнинг расмий сайтига берган изоҳида.

Учрашувнинг иккинчи бўлимида ўйин тўхтатилди. Бунга сабаб — «Реал» қанот ҳужумчиси Винисиус Жуниор «Бенфика» ҳужумчиси Жанлука Престианни уни «маймун» деб ҳақорат қилганини иддао қилди. Қайд этилишича, ўша пайтда аргентиналик футболчи оғзини футболкаси билан ёпиб турган.

Ушбу ҳолатдан аввал Винисиус гол урган ва уни бурчак байроғи олдида рақс тушиб нишонлаган эди. «Бенфика» бош мураббийи Жозе Моуринью фикрича, бу ҳаракат португалиялик мухлисларни провокация қилган.