Мадриднинг «Реал» клуби марказий ҳимоячиси Дин Хёйсен яқин вақт ичида ўз жамоасига ёрдам бера олмайди. Бу ҳақда «қаймоқранглилар» матбуот хизмати маълумот тарқатди.

Испаниялик футболчи болдир мушагидан жароҳат олган. Мадридликлар расмий сайтида футболчининг тикланиш муддати бўйича аниқ маълумот берилмаган.

Marca нашрининг хабарига кўра, «қироллик клуби» Хёйсеннинг тез орада сафга қайтишига умид қилмоқда — ҳимоячи Чемпионлар лигаси доирасидаги «Бенфика»га қарши ўйинга қадар тайёр бўлиши кутилмоқда. Бироқ, Ла Лига доирасидаги навбатдаги «Осасуна» билан баҳсни у албатта ўтказиб юборади.

Жорий мавсумда 20 ёшли ҳимоячи барча мусобақаларда 27 та ўйинда майдонга тушиб, ўз ҳисобига битта гол ва иккита голли узатмани ёздириб қўйган.