«Райо Вальекано» марказий ҳимоячиси Нобель Менди фаолиятини Испаниянинг топ-клубларидан бирида давом эттириши мумкин. Бу ҳақда журналист Экрем Конур маълумот бермоқда.
Манбанинг хабарига кўра, Мадриднинг «Атлетико» ва Каталониянинг «Барселона» клублари 21 ёшли сенегаллик футболчини истиқболли кадр сифатида ўз сафларига қўшиб олиш имкониятини кўриб чиқмоқда.
Жорий мавсумда Менди Испания чемпионати доирасида 14 та учрашувда майдонга тушиб, ўз ҳисобига иккита гол ёздириб қўйди. Таъкидлаш жоизки, айни дамда ҳимоячи ҳуқуқий жиҳатдан «Бетис» клубига тегишли бўлиб, «Райо Вальекано» сафида ижара асосида тўп сурмоқда. Бироқ, шу ёзда у доимий асосда Мадрид клуби («Райо Вальекано») аъзосига айланади.
Transfermarkt портали маълумотларига кўра, Мендининг бозор қиймати 6 миллион еврони ташкил этади.
