«Ливерпуль» устози Арне Слот жамоанинг германиялик вингери Флориан Вирцнинг жароҳати борасида маълумот берди. Футболчи «Ноттингем Форест»га қарши сафар ўйини (1:0) олдидан ўтказилган чигалёзди машғулотлари вақтида шикастланган эди.

«Менимча, унда жиддий ҳеч нарса йўқ. Вирц ўйинга 100 фоиз тайёр эмас эди, шунинг учун биз таваккал қилмасликка қарор қилдик. Ушбу ҳафтада у жамоа сафига қайтади деб умид қиламиз. Бироқ ҳозирча аниқ прогноз бера олмаймиз», — дея нидерландиялик мутахассиснинг сўзларини келтирмоқда клуб матбуот хизмати.

Жорий мавсумда Флориан 25 та учрашувда майдонга тушиб, ўз ҳисобига тўртта гол ва иккита голли узатмани ёздириб қўйган.