УЕФА Жанлука Престианни ва Винисиус Жуниор ўртасидаги воқеа юзасидан суриштирув ишларини давом эттирмоқда — "Реал" футболчиси "Бенфика" аъзосини ирқчиликда айблаган эди. Тергов жараёни давом этаётган бўлса-да, дастлабки хулосаларга кўра Престианни томонидан камситиш ҳолати содир этилгани аниқланган. УЕФА аргентиналик футболчини вақтинчалик битта ўйинга четлатди. Ушбу қарордан сўнг "Бенфика" расмий баёнот билан чиқди.
"Бенфика" УЕФАдан Престианнининг дисквалификацияси ҳақида билдиришнома олганини ва ушбу қарор устидан шикоят қилиш ниятида эканлигини маълум қилди.
"Бенфика" УЕФА қарори устидан апелляция бермоқчи, гарчи вақт нуқтаи назаридан бу "Реал"га қарши жавоб ўйинига бирор-бир таъсир кўрсатиши амримаҳол. Шунингдек, "Бенфика" ирқчилик ва камситишнинг ҳар қандай шаклига қарши курашишда содиқ эканини тасдиқлайди", — дейилади баёнотда.
"Реал" "Бенфика"ни 25 февраль куни қабул қилади. Лиссабонда кечган дастлабки баҳсда мадридликлар 1:0 ҳисобида ғалаба қозонишган эди.
