«Ювентус» бош мураббийи Лучано Спаллетти якшанба куни, 1 март санасида истеъфога чиқарилиши мумкин. Бу ҳақда «La Gazzetta» нашри хабар бермоқда.

Бунга клубнинг муваффақиятсиз иштироки сабаб бўлмоқда — «кекса синьора» охирги бешта ўйинда бирор марта ҳам ғалаба қозона олмади. «Ювентус» Чемпионлар лигасида «Галатасарой»га 2:5 ҳисобида имкониятни бой берди, А Серияда эса «Комо» (0:2) ва «Интер»дан (2:3) мағлубиятга учраб, «Лацио» (2:2) билан дуранг ўйнади. Ушбу омадсиз серия Италия Кубоги доирасида «Аталанта»дан учралган мағлубият (0:3) билан бошланган эди.

Инсайдерларнинг таъкидлашича, Спаллеттига вазиятни ўнглаш учун иккита ўйин берилган. Булар — чоршанба куни Чемпионлар лигасида «Галатасарой»га қарши кечадиган жавоб учрашуви ва А Сериянинг кейинги турида якшанба куни бўлиб ўтадиган «Рома» билан баҳс. Агар «Ювентус» ушбу ўйинларда ҳам муваффақиятсизликка учраса, Спаллетти истеъфога чиқарилади.