Италиялик журналист Маттео Мореттонинг фикрича, франциялик дарвозабон Майк Меньян Туриннинг «Ювентус» клубига ўтиши мумкин эди — ҳар ҳолда, у клубдан жозибадор ва сахий таклиф олган. Бироқ у «Юве»нинг собиқ устози Массимилиано Аллегри бошқараётган «Милан»да қолишни афзал кўрди.
«Ўтган йилнинг охирида «Ювентус» вакиллари Меньян билан боғланишган эди. Улар дарвозабонга «Милан»га қараганда бироз кўпроқ маош таклиф қилишга тайёр эдилар. Аммо Меньян Турин клубида ўйнашни истамаслигини хушмуомалалик билан тушунтирди», — дея Мореттонинг сўзларидан иқтибос келтиради pianetamilan.it.
Меньян 2021 йилдан бери «Милан» шарафини ҳимоя қилиб келмоқда.
