BBC эксперти, Ноттингем университети Жиноят ҳуқуқи кафедраси доценти Хавьер Эскауриаца Мексикадаги тартибсизликлар ЖЧ-2026га қандай таъсир қилиши мумкинлиги ҳақида гапириб берди. Маълумот учун, Мексиканинг бир қатор шаҳарларида наркокартель етакчиси Немесио Осегера Сервантеснинг йўқ қилингани бўлиши мумкинлиги ҳақидаги хабарлардан сўнг норозилик намойишлари авж олган эди.
"Умуман олганда, картеллар Жаҳон чемпионатининг тинч ўтишидан иқтисодий манфаатдор. Тўғри, улар сиёсатчилар ва маҳаллий полицияни сотиб олишади, лекин шу билан бирга улар ресторанларни ҳам сотиб олишади ва меҳмонхоналарга эгалик қилишади. Улар иқтисодий тизимнинг бир қисмидир. Агар британлар, америкаликлар ва бошқалар Мексикага келиб, пул сарфлашса ва вақтларини чоғ ўтказишса, бу картеллар учун ҳам фойдали бўлади", — дея экспертнинг сўзларидан иқтибос келтиради BBC.
Қайд этиш жоизки, Мексика футбол бўйича 2026 йилги Жаҳон чемпионати ўйинларига мезбонлик қилувчи учта давлатдан бири ҳисобланади. Шунингдек, турнир баҳслари АҚШ ва Канадада ҳам бўлиб ўтади. ЖЧ-2026 11 июндан 19 июлга қадар давом этади.
