Футбол бўйича беш карра “Олтин тўп” соҳиби Криштиану Роналду 2026 йилги қишки Олимпия ўйинларида жиддий жароҳат олиб, бешта операцияни бошидан ўтказган чанғичи Линдси Вонни қўллаб-қувватлади. Португалиялик футболчи америкалик спортчининг Instagram саҳифасидаги постларидан бири остида изоҳ ёзиб қолдирган.
“Чемпионлар ғалаба қозонган лаҳзалари ва таслим бўлишни истамаслиги билан ажралиб туради. Сен забт этган чўққилар сендаги бор кучга ҳеч қачон тенг кела олмайди. Курашишда давом эт. Афсоналар доим оёққа туради”, дея ёзган Роналду.
Маълумот учун, 2026 йилнинг 8 февраль куни тизза боғламларидаги жароҳатга қарамай, Олимпиадада тоғ чанғисининг тезкор тушиш баҳсларида қатнашган Линдси Вонн тўсиқлардан бирига урилиб, мувозанатни йўқотгани сабабли пойгани якунлай олмади. Ҳодисадан сўнг америкалик спортчи вертолётда эвакуация қилинди. Спортчи бешта жарроҳлик амалиётини бошидан ўтказди ва ҳатто оёғи ампутация қилиниши хавфи бўлгани ҳақида сўзлаб берган. Йиқилиш натижасида у чап оёғининг болдир суяги синиши жароҳатини олган.
Вонн 41 ёшда, у 2010 йилги Ванкувер Олимпиадаси чемпиони ва икки карра Олимпия ўйинлари бронза медали соҳибидир. Шунингдек, спортчи ҳисобида жаҳон чемпионатлари доирасидаги иккита олтин, учтадан кумуш ва бронза медаллари бор. Америкалик спортчи тўрт марта Жаҳон кубогининг умумий ҳисобида ғолиб чиққан.
