Futbol bo‘yicha besh karra “Oltin to‘p” sohibi Krishtianu Ronaldu 2026 yilgi qishki Olimpiya o‘yinlarida jiddiy jarohat olib, beshta operasiyani boshidan o‘tkazgan chang‘ichi Lindsi Vonni qo‘llab-quvvatladi. Portugaliyalik futbolchi amerikalik sportchining Instagram sahifasidagi postlaridan biri ostida izoh yozib qoldirgan.
“Chempionlar g‘alaba qozongan lahzalari va taslim bo‘lishni istamasligi bilan ajralib turadi. Sen zabt etgan cho‘qqilar sendagi bor kuchga hech qachon teng kela olmaydi. Kurashishda davom et. Afsonalar doim oyoqqa turadi”, deya yozgan Ronaldu.
Ma’lumot uchun, 2026 yilning 8 fevral kuni tizza bog‘lamlaridagi jarohatga qaramay, Olimpiadada tog‘ chang‘isining tezkor tushish bahslarida qatnashgan Lindsi Vonn to‘siqlardan biriga urilib, muvozanatni yo‘qotgani sababli poygani yakunlay olmadi. Hodisadan so‘ng amerikalik sportchi vertolyotda evakuasiya qilindi. Sportchi beshta jarrohlik amaliyotini boshidan o‘tkazdi va hatto oyog‘i amputasiya qilinishi xavfi bo‘lgani haqida so‘zlab bergan. Yiqilish natijasida u chap oyog‘ining boldir suyagi sinishi jarohatini olgan.
Vonn 41 yoshda, u 2010 yilgi Vankuver Olimpiadasi chempioni va ikki karra Olimpiya o‘yinlari bronza medali sohibidir. Shuningdek, sportchi hisobida jahon chempionatlari doirasidagi ikkita oltin, uchtadan kumush va bronza medallari bor. Amerikalik sportchi to‘rt marta Jahon kubogining umumiy hisobida g‘olib chiqqan.
