Мадриднинг «Атлетико» клуби ҳужумчиси, норвегиялик Александр Сёрлот 2025/2026 йилги мавсум УEФА Чемпионлар лигаси плей-офф босқичи доирасида Бельгиянинг «Брюгге» жамоасига қарши кечган жавоб ўйинида (4:1) учта гол урди. Бу билан у «қизил-оқлар» сафида илгари асосий еврокубокда ҳеч кимга насиб этмаган тарихий натижани қайд этди. Бу ҳақда «Opta Sport» статистика портали хабар бермоқда.

Манбанинг маълумотига кўра, 30 ёшли норвегиялик футболчи «Атлетико» тарихида Чемпионлар лигасининг плей-офф учрашувида хет-трик қайд этган илк ўйинчига айланди. Шу билан бирга, таъкидланишича, Сёрлот «матрасчилар» тарихида Чемпионлар лигасининг бир ўйинида (гуруҳ босқичини ҳам ҳисобга олганда) учта гол уришга муваффақ бўлган иккинчи футболчидир. Бундан аввалги натижа 2014 йилнинг ноябрь ойида гуруҳ босқичи 5-тури доирасида Грециянинг «Олимпиакос» жамоасига қарши кечган баҳсда (4:0) хорватиялик Марио Манжукич томонидан ўрнатилган эди.

Сёрлот жорий мавсумда клуб сафида 36 та ўйинда майдонга тушиб, 15 та гол урди ва битта голли узатмани амалга оширди.