«Реал» вингери Винисиус Жуниор кетма-кет бешта ўйинда рақиблар дарвозасини ишғол қилди.

25 ёшли бразилиялик футболчи Чемпионлар лигаси ўтиш босқичи доирасидаги «Бенфика»га қарши жавоб учрашувида (2:1) ўз номини таблога ёздириб қўйди. Вингер голни нишонлаш пайтида, худди дастлабки баҳсда бўлгани каби, бурчак байроқчаси олдида рақсга тушди.

Бунга қадар Винисиус «Райо Вальекано» (2:1), «Бенфика» (1:0), «Осасуна» (1:2) дарвозаларига йўл топган ва «Реал Сосьедад» (4:1) билан ўйинда дублга эришган эди. Ушбу голли серия давомида унинг ҳисобида 6 та гол мавжуд.

Шу тариқа, у ўз фаолиятидаги энг яхши натижасини такрорлади. Бундан аввал 2022 йилнинг август-сентябрь ойларида ҳам Винисиус кетма-кет бешта ўйинда гол уришга (жами 5 та гол) муваффақ бўлган эди.