Куни кеча матбуотда Килиан Мбаппенинг соғлиғи ҳақида анча батафсил маълумотлар пайдо бўлди. Франциялик футболчи сўнгги ҳафталарда ноқулайлик билан ўйнаб келаётган эди, бироқ энди унинг тиззасидаги ҳолат ёмонлашди. Натижада Мбаппе «Бенфика»га қарши ўйинни ўтказиб юборди ва маълум муддатга сафдан чиқди.
«Onda Cero» радиоси журналисти Эду Пидалнинг хабар беришича, «Реал» клуби Мбаппенинг атрофидаги инсонлар томонидан «L’Equipe» газетасига маълумотлар сизиб чиқарилаётганидан норози.
Дарвоқе, «L’Equipe» материалида Мбаппенинг муаммоларида Хаби Алонсо айбдор бўлиши мумкинлиги ҳақида тахмин илгари сурилган. Таъкидланишича, айнан у футболчининг январь ойида муддатидан олдин майдонга қайтишини қўллаб-қувватлаган эди.
«Бенфика»га қарши ўйиндан сўнг Альваро Арбелоа Мбаппе бир неча кун эмас, балки узоқроқ муддатни ўтказиб юборишини маълум қилди — ҳужумчига тўлиқ тикланиши учун вақт берилади.
