Германиянинг "Боруссия" Дортмунд жамоаси бош мураббийи Нико Ковач Италиянинг "Аталанта" клубига қарши бўлиб ўтган Чемпионлар лигаси жавоб ўйинидаги (1:4) мағлубиятга изоҳ берди. "Боруссия" икки ўйин натижасига кўра 3:4 ҳисобида имкониятни бой бериб, турнирнинг 1/8 финалига чиқа олмади.
"Авваламбор, "Аталанта"ни табриклайман. Улар биз биринчи ўйинда қандай ўйнаган бўлсак, худди шундай ўйнашди. Афсуски, урилган голни ҳисобга олмаганда, биз ўз футболимизни кўрсата олмадик. Бу жуда оғир ўйин бўлди, унда биз жуда кўп хатоларга йўл қўйдик, Чемпионлар лигасида эса бундай хатолар учун жазоланишингизга тўғри келади", — дея Ковачнинг сўзларини УЕФА расмий сайти келтиради.
