ФИФАнинг собиқ президенти Йозеф Блаттер Жанни Инфантино шаънига кескин танқидий фикрлар билдирди. Блаттернинг сўзларига кўра, ташкилотнинг амалдаги раҳбари мутлақ ҳокимиятни ўз қўлида тўплаб олган ва жамоавий органларни қарор қабул қилиш жараёнидан амалда чиқариб ташлаган.
"Бугунги кунда ФИФА ким ўзи? У фақат ўз президенти Инфантинодан иборат. ФИФА — бу диктатура! Деярли 40 кишидан иборат ФИФА Кенгаши ҳеч нарсани ҳал қилмайди", — деди Блаттер.
Ташкилотнинг собиқ раҳбари, шунингдек, Инфантинонинг бошқарув услубини Франция монархининг ҳукмронлигига қиёслади.
"У Людовик XIV каби ҳукмронлик қилмоқда. Мен ФИФАдаги одамлардан эшитдимки, у штаб-квартирада кўриниш берганида, бошқалар у билан саломлашишини истамас экан", — дея қўшимча қилди Блаттер.
