«Брайтон» ярим ҳимоячиси Жеймс Милнер Гиннеснинг рекордлар китоби рекордларини забт этганидан сўнг учта алоҳида мукофотга лойиқ кўрилди.

21 февраль куни 40 ёшли англиялик футболчи АПЛнинг 27-тури доирасида «Брентфорд»га қарши ўйинда «Брайтон»нинг асосий таркибида майдонга тушди. Бу унинг чемпионатдаги фаолияти давомидаги 654-учрашуви бўлди. Шу тариқа, Милнер Англия терма жамоаси собиқ ярим ҳимоячиси Гарет Бэррига тегишли бўлган Премьер-лигадаги ўйинлар сони бўйича рекордни янгилади.

Шунингдек, Жеймс АПЛдаги биринчи ва охирги голлари орасидаги энг узоқ вақт (22 йил ва 248 кун) ҳамда чемпионатда кетма-кет ўтказилган мавсумлар сони (24 та) бўйича ҳам рекордларга эга.

«Ёшлигимда ҳар йили Рождество байрамига Гиннеснинг рекордлар китобини совға сифатида олардим. Энди эса у ердан жой олиш ҳайратланарли», — деди Милнер.

Англия терма жамоасининг собиқ аъзоси АПЛдаги дебютини 2002/03 йилги мавсумда ўтказган — у «Лидс» сафида «Вест Хэм»га қарши ўйинда (4:3) захирадан майдонга тушган эди.