«Бенфика» ҳужумкор ярим ҳимоячиси Джанлука Престианни «Реал» форварди Винисиус Жуниорни ирқий камситганини жамоадошлари олдида тан олди.

«Correio da Manhã» нашрига маълум бўлишича, Престианни жамоадошлари билан суҳбатда Винисиусга нисбатан «маймун» сўзини ишлатганини тан олган. Шу билан бирга, футболчи ўзининг ирқчи эмаслигини таъкидлаш учун бир нечта важларни келтириб ўтган.

УЕФА ҳозирча ушбу вазият бўйича терговни якунламаган. Бироқ камситиш факти дастлабки тарзда аниқлангани сабабли, Престианни вақтинчалик битта ўйинга дисквалификация қилинди.

Эслатиб ўтамиз, «Бенфика» Чемпионлар лигасининг плей-офф босқичида «Реал»га икки ўйин натижасига кўра (уйда 0:1, сафарда 1:2) имкониятни бой бериб, мусобақадан чиқиб кетди.