«Сантос»нинг бразилиялик ҳужумчиси Неймар «Васко да Гама» дарвозасига гол урганидан сўнг (2:1), «Реал» форварди Винисиус Жуниорнинг Чемпионлар лигасидаги баҳсли гол нишонлашини такрорлади.

Эслатиб ўтамиз, «Бенфика»га қарши Чемпионлар лигаси плей-офф босқичининг дастлабки ўйинида Винисиус 50-дақиқада гол урган ва бурчак байроғи ёнида рақсга тушиб, ўз голини нишонлаган эди. Бу Лиссабон клуби мухлисларига ёқмаган, ҳужумчи эса ушбу ҳаракати учун сариқ карточка билан жазоланган эди.

Кейинчалик Винисиус учрашув бош ҳаками Франсуа Летексье олдига югуриб бориб, аввалроқ ўзаро тўқнашиб кетган ярим ҳимоячи Джанлука Престианни томонга ишора қилган. Шундан сўнг ҳакам ирқчилик аломатлари юз бергани ҳақида сигнал берувчи ишорани кўрсатган.

Ушбу ҳолатдан сўнг, УЕФА мадридлик вингерни ирқий камситганликда гумон қилиб, аргентиналик ярим ҳимоячини вақтинчалик дисквалификация қилган эди.