Баскетбол афсоналаридан бири Крис Бош ижтимоий тармоқдаги саҳифасида дунёқарашини бутунлай ўзгартириб юборган ҳодиса ҳақида сўзлаб берди. Собиқ спортчининг сўзларига кўра, у рафиқаси билан учрашувга тайёргарлик кўраётган вақтда тўсатдан ҳушини йўқотган ва бир оз вақт ўтгач, оғир аҳволда ўзига келган.

“Ҳушимга қайтганимдан сўнг ҳеч қандай аниқлик пайдо бўлгани йўқ. Мен ҳамма ёғим қон бўлган ҳолда уйғондим. Бу даҳшат эди. Ҳаммаси жуда тез ва бир зумда содир бўлди. Кўз олдимдан ўтмиш кадрларим ўтмади. Фақат ҳамон тирик эканлигим учун шукроналик ва борлиқ аслида қандай эканини англатувчи янги, оғир хулоса пайдо бўлди. Ҳаётга бўлган қарашим ўзгарди — у оддийроқ ва ҳалолроқ бўлди”, деди Бош ижтимоий тармоқдаги саҳифасига жойланган видеода.

Бироқ Бош ҳодисага сабаб бўлган аниқ тафсилотларни ҳозирча ошкор қилмаган.

Маълумот учун, Крис Бошнинг NBA’даги фаолияти 2017 йилда қонида тромблар пайдо бўлиши билан боғлиқ муаммолар туфайли муддатидан олдин якунланган эди. Баскетболчи “Маями Ҳит” таркибида икки марта NBA чемпиони бўлган, Шимолий Америка лигасидаги 13 мавсуми давомида эса 11 марта “Барча юлдузлар ўйини”да (All-Star XI) иштирок этган.

2010 йилда “Рапторс”даги етти йиллик фаолиятидан сўнг, Бош “Маями Ҳит”га ўтди. Маямида у ўзининг дўстлари — Дуэйн Уэйд ҳамда Леброн Жеймс билан бирлашди. Ушбу трио “Катта учлик” номи билан танилди. Жамоа 2011 йилдан 2014 йилгача кетма-кет тўрт мавсум NBA финалида қатнашди ва 2012, 2013 йилларда турнир ғолиблигини қўлга киритди.