«Барселона» ярим ҳимоячиси Гави жароҳатидан сўнг майдонга қайтишга тайёргарлик кўрмоқда.

21 ёшли футболчи август ойидан бери ўйинларда иштирок этмаяпти — у тиззасидан навбатдаги операцияни бошидан ўтказишига тўғри келди. Кутилишича, март ойидаёқ бош мураббий Ханс-Дитер Флик яна хавбек хизматларидан фойдаланиши мумкин бўлади.

«Ушбу эмблемани яна ҳимоя қилиш учун машғулот ўтаб, формага киряпман!» — деб ёзди испаниялик футболчи ижтимоий тармоқлардаги саҳифасида машғулот жараёнидан фотосурат илова қилган ҳолда. Шанба куни «Барселона» Ла Лиганинг 26-тури доирасида ўз майдонида «Вильярреал»ни қабул қилади.

Ҳозирда каталонияликлар 61 очко жамғарган ҳолда турнир жадвалида пешқадамлик қилмоқда ва Мадриднинг «Реал» клубини (60) битта очкога ортда қолдирмоқда.