"Бенфика" ўзининг "X" ижтимоий тармоғидаги расмий саҳифасида Португалия чемпионатининг 24-туридан ўрин олган "Порту" — "Арока" (3:1) учрашувида белгиланган пенальти вазиятини кескин танқид қилди.
"Йўқ жойдан ўйлаб топилган пенальти, сохта ғалаба. Икки очко сизга шунчаки совға қилинди. Бу пешқадамликни сақлаб қолишни осонлаштиради", — дейилади вазият видеоси илова қилинган хабарда.
Ўйиннинг қўшиб берилган вақтида, ҳисоб 1:1 бўлиб турган пайтда "Арока" дарвозасига пенальти белгиланди. Ўн бир метрлик жарима зарбасини Виллиам Гомеш аниқ амалга ошириб, "аждарлар"га ғалаба келтирди.
"Порту" 65 очко билан Португалия чемпионати турнир жадвалида пешқадамлик қилмоқда. "Бенфика" эса битта захира ўйинига эга бўлган ҳолда 55 очко билан 3-ўринда бормоқда.
