"Астон Вилла" собиқ футболчиси Ли Хендри Англия чемпионатининг сўнгги туридаги мағлубиятдан сўнг собиқ жамоасидаги вазиятдан хавотирда эканлигини билдирди. Чемпионлар лигаси йўлланмаси учун даъвогарлик қилаётган жамоа сўнгги ўринда бораётган "Вулверхэмптон"га 0:2 ҳисобида имкониятни бой берди.
"Астон Вилла" мураббий Унаи Эмери бошчилигида АПЛнинг сўнгги 10 та ўйинидан фақат 3 тасида ғалаба қозонди.
"Ўтмишдаги яхши спорт формасига қарамай — ҳозир на характер, на ишонч кўринмаяпти. Натижалар даҳшатли. Ҳозир "Вилла"нинг мавсуми қил устида турибди... Мен ваҳимага туша бошладим. Олдинда муҳим ўйинлар бор ва жамоа парчаланиб кетиши мумкинлигини кўряпман", — дея Хендрининг сўзларидан иқтибос келтиради "Sky Sports".
"Бу АПЛнинг ҳал қилувчи босқичи, мен эса жамоада реакция кўрмаяпман — мана шу мени хавотирга солмоқда. Яқин орада чемпионлик учун кураш ҳақида гапираётган эдик, энди эса кучли бешликдан чиқиб кетиш ҳақида гап кетяпти. Бу фалокат бўлади", — деб қўшимча қилди у.
Олдинда "Астон Вилла"ни муҳим баҳслар кутмоқда: чемпионатда "Челси" ва "Манчестер Юнайтед"га қарши ўйинлар, шунингдек, Европа Лигасида "Лилль" билан икки учрашувдан иборат қарама-қаршилик.
