"Ливерпуль" бош мураббийи Арне Слот вингер Рио Нгумоҳага кўпроқ ўйин амалиёти тақдим этишни режалаштирмоқда.

17 ёшли футболчи жорий мавсумда "қизиллар"нинг 15 та учрашувида майдонга тушди, бироқ фақат уч бор асосий таркибда кўриниш берди (АПЛ ва Чемпионлар лигасида ҳали бирор марта асосий таркибда қайд этилмаган). Журналист Пол Жойснинг маълумотларига кўра, "Ливерпуль" устози мавсумнинг қолган қисмида жамоанинг "чиқиб келаётган юлдузи"га ишонишга тайёр. Нидерландиялик мутахассис ёш инглизнинг рақибларни яккама-якка курашда алдаб ўтиш қобилияти жамоага катта ёрдам бериши мумкин деб ҳисоблайди.

Эслатиб ўтамиз, август ойида "Ньюкасл"га қарши кечган баҳсда Рио Нгумоха мерсисайдликлар асосий жамоаси сафидаги ҳозирча ягона голини киритган эди.