Миланнинг "Интер" клуби чап қанот ҳимоячиси Федерико Димарко жорий мавсумдаги А Серияда гол+пас тизими бўйича пешқадамлик қилмоқда.
Шанба куни 28 ёшли футболчи голли узатмалар бериш бўйича рекорд даражадаги сериясини тўхтатди, аммо унинг ўзи гол уришга муваффақ бўлди. "Нерадзуррилар" "Дженоа" устидан 2:0 ҳисобида ғалаба қозонишди.
Ҳозирда Димарконинг ҳисобида чемпионат доирасида 21 та самарали ҳаракат мавжуд (6 та гол ва 15 та ассист) – бу барча ўйинчилар орасидаги энг яхши кўрсаткичдир. Рейтингнинг иккинчи поғонасида "Интер" ҳужумчиси Лаутаро Мартинес (18), учинчи ўринда эса "Комо" аъзоси Николас Пас (15) бормоқда.
"Интер" 27 турдан сўнг 67 очко жамғарган ҳолда А Серия турнир жадвалида ишонч билан пешқадамлик қилмоқда ва "Милан"ни 13 очкога ортда қолдирмоқда.
