"Бавария" дарвозабони Мануэль Нойер УЕФА Чемпионлар лигаси 1/8 финал қуръаси натижаларини баҳолади. Мусобақанинг ушбу босқичида Мюнхен клуби Италиянинг "Аталанта" жамоаси билан тўқнаш келади.
"Бизда Чемпионлар лигаси ўйинларини, жумладан, "Аталанта"нинг Дортмунднинг "Боруссия"сига қарши баҳсини кузатиш учун вақт бўлди. Улар ўз уйида қанчалик яхши ўйнашини кўрдик. Уларнинг кам имконият билан катта натижаларга эришаётгани кишини ҳайратда қолдиради.
Менимча, улар ўзларининг энг яхши кунида тоғларни талқон қила олишади. Шу боис, биринчи ўйин Бергамода ўтиши ёмон эмас, шундан сўнг биз қайси даражада эканимизни билиб оламиз. Ушбу халқаро қарама-қаршиликни интиқлик билан кутяпмиз. Албатта, италиялик рақиб билан ўйин, масалан, "Байер"га қарши баҳсдан кўра кўпроқ Чемпионлар лигаси руҳини беради", — дея Нойернинг сўзларини келтиради Мюнхен клуби расмий сайти.
