Мадриднинг "Реал" клуби мураббийи Альваро Арбелоа 2 март куни бўлиб ўтадиган "Хетафе"га қарши ўйинда жароҳатидан қутилган ҳужумчи Родригони таркибга қайтариши мумкин. Бу ҳақда "COPE" нашри хабар бермоқда.
Таркибга оид бошқа янгиликларга тўхталадиган бўлсак, Килиан Мбаппе Ла Лиганинг навбатдаги ўйинида майдонга туша олмаслиги аниқ, унинг "Сельта"га қарши баҳсдаги иштироки ҳам сўроқ остида турибди. Манбанинг маълумотига кўра, агар бирор кутилмаган ҳолат юз бермаса, Мбаппе Чемпионлар лигаси 1/8 финалининг жавоб учрашувига (17 март) қадар тайёр бўлади.
Энг ёмон ҳолат Эдер Милитао билан боғлиқ. Марказий ҳимоячи 1/8 финал ўйинларини ўтказиб юборади, унинг сафга қайтиши терма жамоалар танаффусидан кейинга кутилмоқда. Хёйсенга келсак, у "Хетафе"га қарши ўйнамайди, бироқ Вигодаги баҳсгача сафга қайтиши тахмин қилинмоқда.
Ниҳоят, Жуд Беллингем ва Дани Себальос билан боғлиқ вазият анча ноаниқ бўлиб турибди. Ҳар икки ярим ҳимоячида "Атлетико"га қарши дербида (22 март) майдонга тушиш учун кичик имконият мавжуд. Клуб раҳбарияти уларнинг тўлиқ тикланишини таъминлаш мақсадида яна бироз дам бериш вариантини ҳам истисно этмаяпти.
