"Манчестер Юнайтед" скаутлари "Штутгарт"нинг 20 ёшли ярим ҳимоячиси Чема Андреснинг ўйинидан ҳайратда қолишди. Бироқ, "қизил иблислар"нинг эҳтимолий трансферига ўтган ёзда футболчини "шваблар"га сотган Мадриднинг "Реал" клуби тўсқинлик қилиши мумкин. "Қаймоқранглилар" ўз академияси битирувчисини қайтариш вариантини кўриб чиқмоқдалар. Бу ҳақда TEAMtalk хабар бермоқда.
Манбанинг маълумотига кўра, "Қироллик клуби" Андресни 11,4 миллион евро эвазига қайта сотиб олиш ҳуқуқини опциясини сақлаб қолган. "Реал" ушбу бандни келаётган ёзда фаоллаштириши мумкин.
Таъкидланишича, ўз ўйин услуби ва сифатларига кўра ярим ҳимоячи "Манчестер Сити" юлдузи Родри ва "Барселона"нинг собиқ аъзоси Серхио Бускетсга ўхшаб кетади.
Жорий мавсумда Андрес барча мусобақаларда 29 та ўйинда иштирок этиб, 2 та гол ва 2 та голли узатмага муаллифлик қилди. Футболчининг клуб билан амалдаги шартномаси 2030 йил ёзигача мўлжалланган. Transfermarkt портали маълумотларига кўра, футболчининг бозор қиймати 15 миллион еврони ташкил этади.
