"Барселона" ҳужумчиси Роберт Левандовски жароҳат туфайли сафдан чиқди. 37 ёшли футболчи кўз косаси суягининг синишидан азият чекмоқда ва Испания Кубоги ярим финали доирасида Мадриднинг "Атлетико" жамоасига қарши бўлиб ўтадиган яқин орадаги баҳсда аниқ иштирок эта олмайди.

"Mundo Deportivo" нашрининг хабар беришича, польшалик ҳужумчини катта эҳтимол билан, аввал ҳам бўлганидек, Ферран Торрес алмаштириши кутилмоқда. Бироқ бош мураббий Ханс-Дитер Флик Дани Ольмони "ёлғон тўққизлик" ролида синаб кўриш вариантини ҳам кўриб чиқмоқда.

"Барселона" ва "Атлетико" ўртасидаги учрашув 3 март куни "Камп Ноу" стадионида бўлиб ўтади. Жамоаларнинг дастлабки тўқнашувида "матрасчилар" 4:0 ҳисобида йирик ғалабани қўлга киритган эдилар.