Германия терма жамоаси бош мураббийи Юлиан Нагельсманн жароҳат туфайли узоқ вақт сафдан чиққан Жамал Мусиала ва Кай Хаверцни таркибга қайтаришни режалаштирмоқда.
Жамоа устози "Бавария" ҳужумкор ярим ҳимоячиси ва "Арсенал" ҳужумчисини март ойидаги йиғинга чақириш ниятида эканлигини тасдиқлади.
"Уларнинг таркибга қайтиши мантиқий туюлади, чунки улар терма жамоа ўйинларида охирги марта кўриниш берганидан бери бутун бир аср ўтгандек туюлмоқда. Мен Жамални жамоамизда ўн ойдан кўпроқ вақт давомида кўрмадим, Кайни эса ундан ҳам узоқроқ. Уларнинг яна майдонга тушиши жуда муҳим, акс ҳолда Жаҳон чемпионати олдидан ўйин ритмини топиб олишлари қийин бўлади", — дея Нагельсманннинг сўзларини журналист Флориан Плеттенберг келтирмоқда.
Германия миллий терма жамоаси март ойида Швейцария (27 март) ва Гана (30 март) терма жамоаларига қарши ўртоқлик учрашувларини ўтказади.
