Лондоннинг "Арсенал" клуби бош мураббийи Микель Артета ярим ҳимоячи Деклан Райснинг ҳолати ҳақидаги саволга жавоб берди.
27 ёшли футболчи якшанба куни бўлиб ўтган "Челси"га қарши дербида (2:1) Юррьен Тимберга голли узатмани амалга ошириб, "канонирлар"нинг ғалабасига ҳисса қўшган эди. Учрашувнинг 76-дақиқасида хавбек Кристиан Нёргорга алмаштирилди.
"Бу қанчалик жиддий эканини билмайман, лекин Декланнинг ўзи алмаштиришни сўради. Биз тиббий кўрик натижаларини кутишимиз керак — шундан кейингина унинг чоршанба кунги ўйинда иштирок эта олиши маълум бўлади", — деди Артета матбуот анжуманида.
4 март куни "Арсенал" Премьер-лига доирасида сафарда "Брайтон"га қарши баҳс олиб боради.
