«Ювентус» директори Жоржо Кьеллини клуб бош мураббий Лучано Спаллетти билан шартномани узайтириш ниятида эканлигини яширмаяпти.

Сўнгги вақтларда туринликлар ўйинида пасайиш кузатилаётган бўлса-да, «кекса синьора» раҳбарияти амалдаги шартномаси ёзда якунига етадиган мураббийнинг ишини ҳамон ижобий баҳоламоқда.

«Тез орада Лучано билан янги шартномани муҳокама қиламиз. Яна бир бор қайтараман, «Ювентус» мураббийлик курсисида ундан бошқа ҳеч кимни кўрмаяпман», — деди Кьеллини.

Эслатиб ўтамиз, Лучано Спаллетти ўтган йилнинг октябрь ойи охирида ушбу лавозимни эгаллаган эди. Ҳозирда жамоа Италия А Серияси турнир жадвалида олтинчи поғонада бормоқда.