«Yuventus» direktori Jorjo Kyellini klub bosh murabbiy Luchano Spalletti bilan shartnomani uzaytirish niyatida ekanligini yashirmayapti.
So‘nggi vaqtlarda turinliklar o‘yinida pasayish kuzatilayotgan bo‘lsa-da, «keksa sinyora» rahbariyati amaldagi shartnomasi yozda yakuniga yetadigan murabbiyning ishini hamon ijobiy baholamoqda.
«Tez orada Luchano bilan yangi shartnomani muhokama qilamiz. Yana bir bor qaytaraman, «Yuventus» murabbiylik kursisida undan boshqa hech kimni ko‘rmayapman», — dedi Kyellini.
Eslatib o‘tamiz, Luchano Spalletti o‘tgan yilning oktyabr oyi oxirida ushbu lavozimni egallagan edi. Hozirda jamoa Italiya A Seriyasi turnir jadvalida oltinchi pog‘onada bormoqda.
