«Хетафе» бош мураббийи Хосе Бордалас Мадриднинг «Реал» клуби устидан қозонилган сенсацион ғалабадан сўнг ўз фикрларини билдирди. Ла Лиганинг 26-тури доирасида 2 март куни бўлиб ўтган учрашув 1:0 ҳисобида меҳмонлар фойдасига ҳал бўлди.

«Пешқадамлик учун курашаётган «Реал» устидан қозонилган ушбу жуда муҳим ғалабани қадрлашимиз керак. Ўйин учун тузилган режа идеал даражада иш берди. Бу айнан мен истаган нарса: ғалаба менталитетига эга, сафарга йўл олиб, ҳафта давомида устида ишлаган режаларимизни ҳаётга татбиқ эта оладиган жамоа», — дея Бордаласнинг сўзларидан иқтибос келтиради Marca.

«Бернабеу»да ғалаба қозониш ҳар кимнинг ҳам қўлидан келмаслигини ҳаммамиз биламиз. Биз тарихдаги энг яхши клублардан бири ҳақида гапиряпмиз. Қийналишимизга тўғри келишини билардик. Биринчи бўлимда, қарши ҳужумларда бироз хотиржамроқ ҳаракат қилганимизда, мадридликларга кўпроқ муаммо туғдирган бўлардик. Аммо барибир жуда фахрланаман. Рақиб вазиятлар яратишини билардик, лекин улар одатдагидан камроқ бўлди. Йигитларни табриклайман, улар исталган жойда ва исталган рақибни мағлуб этишга қодир. Айнан шунга ишониш керак».

Шунингдек, Бордалас жамоа хавфли ҳудуддан узоқлашган бўлса-да, мавсум учун белгиланган мақсадга эришиш йўлида ҳали ҳеч нарса қилинмаганини таъкидлади. Ҳозирда «Хетафе» ҳисобида 32 очко мавжуд ва жамоа турнир жадвалида ўн биринчи ўринни эгаллаб турибди. «Реал» 60 очко билан иккинчи, «Барселона»да эса 4 очко кўп.