"Хетафе" ҳужумчиси Мартин Сатриано Ла Лиганинг 26-туридан ўрин олган "Реал"га қарши ўйиннинг 1-бўлимида Антонио Рюдигер ва Диего Рико иштирокида юз берган вазият ҳақида гапирди.
Кеча бўлиб ўтган учрашувда "Хетафе" 1:0 ҳисобида ғалаба қозонди. Ўйиннинг 26-дақиқасида "Хетафе" ҳимоячиси Диего Рико қанот бўйлаб тўп билан ҳаракатланаётганда Арда Гюлер билан курашда йиқилди. Кейинроқ эпизодга қўшилган Рюдигер йиқилаётиб чап тиззаси билан рақибининг аввал елкасига, сўнгра жағига зарба берди. Рико юзини ушлаганча қолди ва ўйин тўхтатилди. Ҳакам Алехандро Муньис майдонга шифокорларни таклиф қилди, бироқ қоида бузилишини қайд этмади.
"Мен тизза билан юзга берилган зарбани ўз кўзим билан кўрдим. Ундан кейин нима бўлганини эса билмайман", — деди Сатриано DAZN нашрига берган интервьюсида.
