«Ливерпуль» Англия Премьер-лигасининг 29-тури доирасида кечган баҳсда «Вулверхэмптон»дан мағлубиятга учради (1:2).

«Бўрилар» учрашувнинг 94-дақиқасида Андре томонидан киритилган гол эвазига уч очкони илиб кетишди. Opta маълумотларига кўра, «Ливерпуль» АПЛ тарихида бир мавсум давомида 90-дақиқа ёки ундан кейин беш маротаба рақибларига ғалаба голини совға қилган (ўтказиб юборган) илк жамоага айланди. Бунгача ҳеч бир жамоа бир мавсум давомида қўшиб берилган вақтда тўрт мартадан ортиқ дурангни қўлдан чиқармаган эди.

Ҳозирда «Ливерпуль» 48 очко билан турнир жадвалида бешинчи ўринни эгаллаб турибди. «Вулверхэмптон» эса кетма-кет иккита ғалабага эришганига қарамай, 16 очко билан сўнгги поғонада қолмоқда.