«Астон Вилла» ярим ҳимоячиси Морган Роджерс катта эҳтимол билан келаётган ёзда сотиб юборилади.
Бирмингем клуби агар мавсум якунларига кўра Чемпионлар лигасига йўлланма ололмаса, баъзи асосий футболчилари билан хайрлашишга мажбур бўлиши мумкин. Трансфер бозорида катта қизиқиш уйғотаётган Рожерс сотилишга номзодлардан бири бўлиб турибди. Anfield Watch нашрининг хабар беришича, 23 ёшли футболчи учун курашда «Ливерпуль» пешқадамлик қилмоқда. Эҳтимолий келишув қиймати 100 миллион фунт стерлинг (115 миллион евро)га баҳоланмоқда.
Машҳур Transfermarkt порталида Морган Роджерснинг нархи 70 миллион евро этиб белгиланган. Англиялик футболчининг «Астон Вилла» билан амалдаги шартномаси 2031 йилгача мўлжалланган.
