Агар «Ливерпуль» жорий мавсум якунларига кўра Чемпионлар лигасига йўлланма ололмаса, 120 миллион фунт стерлинг миқдоридаги даромаддан маҳрум бўлиши мумкин. Бу ҳақда BBC нашри хабар бермоқда.
Манбанинг таъкидлашича, Кўҳна қитъанинг энг нуфузли клублар турнирида иштирок этмаслик мерсисайдликларнинг даромадларини сезиларли даражада камайтириши мумкин. Шунга қарамай, ўтган ёзги трансфер ойнасидаги катта харажатларга қарамай, клубдаги молиявий ҳолат барқарорлигича қолмоқда.
Айни дамда «Ливерпуль» 48 очко билан Англия Премьер-лигаси турнир жадвалида бешинчи ўринда бормоқда. Чемпионлар лигасининг жорий мавсумида эса жамоа умумий босқич якунларига кўра учинчи ўринни эгаллади ва 1/8 финалда Туркиянинг «Галатасарой» клубига қарши баҳс олиб боради.
