Чоршанба куни Микель Артета шогирдлари Англия Премьер-лигасининг 29-тури доирасида сафарда «Брайтон» жамоасини 1:0 ҳисобида мағлуб этди. Учрашувдаги ягона гол 9-дақиқада Букайо Сака томонидан киритилди.

Ушбу баҳсда «Арсенал» футболчилари ўйиндаги тўхталишлардан сўнг тўпни яна майдонга киритиш (ўйинни қайта бошлаш) учун жами 30 дақиқа ва 51 сония вақт сарфлашди. Бу «канонирлар» учун жорий мавсумдаги рекорд кўрсаткич ҳисобланади.

Ушбу вазият «Брайтон» бош мураббийи Фабиан Хюрцелернинг кескин эътирозига сабаб бўлди. У ўйиндан сўнг «Арсенал»нинг бундай ҳаракатларини «футбол эмас» деб атади ва Премьер-лигани вақт чўзишга қарши чора кўришга чақирди.

Шундай бўлса-да, ушбу ғалаба ва «Манчестер Сити»нинг «Ноттингем Форест» билан дуранг ўйнаши (2:2) натижасида «Арсенал» турнир жадвалидаги пешқадамликни 7 очкогача ошириб олди.