«Манчестер Юнайтед» жамоанинг асосий юлдузларидан бири Бруну Фернандешга янги шартнома таклиф қилиши мумкин. The Mirror нашрининг хабарига кўра, янги келишувга биноан футболчининг ҳафталик маоши 400 минг фунт стерлинггача етиши мумкин.
Манбанинг таъкидлашича, Фернандешнинг «Олд Траффорд»да қолиш ёки қолмаслик борасидаги қарори клубнинг мавсум якунига кўра Чемпионлар лигасига йўлланма олишига боғлиқ бўлади. Португалиялик футболчи учун ҳозирда пул эмас, балки фаолиятидаги спорт амбициялари ва юқори савиядаги мусобақаларда иштирок этиш асосий стимул ҳисобланади.
Жорий мавсумда «Манчестер Юнайтед» еврокубокларда иштирок этмаяпти. Бруну Фернандеш эса барча турнирларда 28 та ўйинда майдонга тушиб, ўз ҳисобига 7 та гол ва 15 та голли узатмани ёздириб қўйишга улгурди.
