Лондоннинг "Тоттенхэм" клуби Англия чемпионати 29-турининг сўнгги ўйинини жуда муваффақиятсиз ўтказди. Жамоа "Кристал Пэлас" билан баҳсда ҳисобни очган бўлса-да, кейинчалик қизил карточка ва дарвозасига белгиланган пенальтини "сотиб олди", шундан сўнг голлар худди шохдан тўкилаётгандек ёғила бошлади. Танаффусга қадар "Кристал Пэлас" аллақачон 3:1 ҳисобида олдинга чиқиб олди.
Натижада, "Тоттенхэм" мухлислари жамоанинг ҳатто ўз уйида, уларнинг қўллаб-қувватлаши остида ҳам вазиятни ўнглай олишига ишонмай, стадионни фаол тарзда тарк эта бошлашди. Учрашувнинг иккинчи бўлими бошланишига қадар камида 40 фоиз мухлислар стадиондан чиқиб кетишган эди.
Эслатиб ўтамиз, айни дамда "Тоттенхэм" Англия Премьер-лигаси турнир жадвалида бор-йўғи ўн олтинчи ўринни эгаллаб турибди.
