«Пари Сен-Жермен» бош мураббийи Луис Энрике Франция чемпионатининг 25-тури доирасида «Монако»га қарши бўлиб ўтадиган ўйин олдидан матбуот анжуманида иштирок этди. Учрашув 6 март куни Тошкент вақти билан соат 00:45 да (7 мартга ўтар кечаси) бошланиши белгиланган.
«Мавсумнинг энг яхши палласи бошланиш арафасида. Биз шу вақтгача нималарни амалга оширганимиз ва яна нималарни яхшилашимиз кераклиги ҳақида кўп гаплашдик. Футболчилар ўйиндан завқ олишларини истардим. Бизни олдинда бир қатор йирик учрашувлар кутмоқда. Ўз майдонимизда «Монако»га қарши кечадиган баҳс жуда муҳим ва бизга уч очко зарур», — дея мураббийнинг сўзларини келтирмоқда клуб расмий сайти.
«Бу Чемпионлар лигаси даражасидаги ўйин бўлишини биламиз. Ўз менталитетимизни сақлаб қолган ҳолда, машғулотларда ишлаб чиққан режаларимизни амалда қўллашни хоҳлаймиз. Рақибларимиз қандай услубда ўйнашидан қатъи назар, биз бор эътиборимизни ўзимиз уддалай оладиган ишларга қаратамиз», — дея қўшимча қилди Луис Энрике.
Ҳозирда "ПСЖ" 57 очко билан чемпионатда пешқадамлик қилмоқда. «Монако» эса улардан 20 очко кам жамғарган ҳолда, турнир жадвалининг еттинчи поғонасида бормоқда.
