Лондоннинг «Тоттенхэм» клуби февраль ойида Томас Франк билан хайрлашиб, мавсум якунига қадар Игор Тудорни вақтинчалик бош мураббий этиб тайинлаган эди. Бироқ хорватиялик мутахассис кутилган натижани бера олмади — жамоа унинг қўл остида учта ўйинда мағлубиятга учради ва ҳозирда Премьер-лиганинг хавфли ҳудудига яқинлашиб қолган. Хабарларга кўра, «Тоттенхэм» аллақачон Тудорни истеъфога чиқариш ҳақида ўйламоқда.
Transfer News Live нашрининг Corriere dello Sport нашрига таяниб хабар беришича, «Тоттенхэм» «Ювентус»нинг яна бир собиқ мураббийи — Тьяго Мотта номзодини кўриб чиқмоқда. У деярли бир йилдан бери клубсиз юрибди.
Қизиғи шундаки, 2025 йилнинг мартида Игор Тудор «Ювентус» бошқарувида Тьяго Моттанинг ўрнини эгаллаган эди. Энди эса «Тоттенхэм»да вазият тескарисига айланиши мумкин.
