«Ювентус» ҳужумчиси Жонатан Дэвид фаолиятини Англияда давом эттириши мумкин.

Calciomercato нашрининг хабарига кўра, канадалик форварднинг трансферига «Астон Вилла» қизиқиш билдирмоқда. Турин клуби ўз футболчисини қўйиб юборишга тайёр. «Ювентус» Дэвиднинг сотувидан 15-18 миллион евро ишлаб олишни кўзламоқда.

Жонатан Дэвид 2025 йилда «Лилль»дан эркин агент сифатида «Ювентус»га ўтган эди. Унинг амалдаги шартномаси 2030 йилнинг 30 июнига қадар мўлжалланган. Жорий мавсумда ҳужумчи Турин клуби сафида барча мусобақаларда 38 та ўйинда майдонга тушиб, 7 та гол урди ва 5 та голли узатмани амалга оширди. Transfermarkt портали канадалик футболчининг қийматини 35 миллион еврога баҳоламоқда.