Мадриднинг «Реал» клуби собиқ ҳужумчиси Карим Бензема жамоанинг жорий мавсумдаги муаммолари сабаблари ҳақида фикр билдирди.

«Қаймоқранглилар» йил бошида Хаби Алонсо билан хайрлашиб бўлишган, бироқ Альваро Арбелоа қўл остида ҳам ҳозирча барқарорликка эриша олишмаяпти.

«Реал»га фақатгина юлдузлар — Мбаппе, Винисиус, Беллингем ва Родриго ўртасидаги алоқа етишмаяпти. Ҳар бир футболчи майдондаги ўз вазифасини билиши лозим. Беллингем ўзининг тўпурар эмас, балки плеймейкер эканини тушуниши керак. Мбаппе — тўпурар, лекин плеймейкер эмас. Вини — чап қанот вингери, таянч ярим ҳимоячиси эмас. Қачонки ҳар бир ўйинчи майдонда нима қилиш кераклигини англаб етса, ҳаммаси ўзгаради. Шундагина бир жамоага йиғилган дунёнинг энг яхши футболчилари борасидаги баҳсларга чек қўямиз», — дея ҳозирда «Ал-Ҳилол» шарафини ҳимоя қилаётган Бенземанинг сўзларидан иқтибос келтиради Madrid Universal.

Мадрид гранди 27-турдан сўнг Ла Лига турнир жадвалида «Барселона»дан тўрт очко ортда қолган ҳолда иккинчи ўринни эгаллаб турибди.