«Бавария» ярим ҳимоячиси Александр Павлович Чемпионлар лигаси 1/8 финали доирасидаги Италиянинг «Аталанта» жамоасига қарши баҳс олдидан ўз кутилмалари билан ўртоқлашди.

Дастлабки тўқнашув сешанба куни, 10 мартда Бергамода бўлиб ўтади, жавоб учрашуви эса саккиз кундан кейин Мюнхенда ўтказилади.

«Бу гал яна бир немис жамоаси билан ўйнамаётганимиздан хурсандман. Ўйинни интиқлик билан кутяпман, биз ғалаба қозониш иштиёқида ёняпмиз. «Аталанта» типик Италия жамоаси каби ажойиб ҳимояланади ва қарши ҳужумларда қийинчилик туғдиришга қодир. Биз диққатли бўлишимиз ва ўз футболимизни кўрсатишимиз керак. Агар Чемпионлар лигасида ғолиб чиқмоқчи бўлсанг, барча рақибларни мағлуб этишинг лозим, шунинг учун менга ким билан тўқнаш келишимизнинг фарқи йўқ. Қадамма-қадам олдинга интиламиз — кейин кўрамиз», — дея Павловичнинг сўзларидан иқтибос келтирмоқда Bayern & Germany.

Эртанги «Аталанта» ва «Бавария» ўртасидаги ўйин Тошкент вақти билан тунги соат 01:00 да бошланади.